Ս.թ. նոյեմբերի 23-ին հանդիսավորապես բացվեց Երևանի պետական բժշկական համալսարանի բժշկական ուլտրաախտորոշման լաբորատորիան: Լաբորատորիան համալսարանի գործող լաբորատոր-ախտորոշիչ կենտրոնի մի մասն է և գտնվում է համալսարանական առաջին հիվանդանոցային համալիրի տարածքում:

Լաբորատորիան հագեցված է ժամանակակից նորագույն սարքավորումներով, որոնց շնորհիվ հնարավոր է սեղմ ժամկետներում ստանալ շուրջ հարյուր ճշգրիտ ախտորոշիչ տվյալներ սիրտանոթային, ժառանգական, ուռուցքային և վարակիչ հիվանդությունների վերաբերյալ։ Նշյալ սարքավորումների կիրառությունը հնարավորություն է ընձեռում հետազոտել օրական 300 հիվանդ: Լաբորատորիան տեխնիկապես զինվել է «Հայաստանի էլեկտրական ցանցեր» ՓԲԸ-ի ֆինանսական օժանդակությամբ։ Ընկերության կողմից ներդրված գումարն օգտագործվել է որպես կանխավճար, իսկ մնացածը մարվելու է ԵՊԲՀ-ի կողմից մեկուկես տարվա ընթացքում։ Լաբորատորիայում գործում են հետևյալ սարքավորումները.

• ԴՆԹ/ՌՆԹ ավտոմատ անջատող սարք
• Իրական ժամանակում ՊՇՌ սարք
• Ցենտրիֆուգ
• Ծրագրավորվող ռոտատոր
• Հեմատոլոգիական և մարմնի կենսաբանական հեղուկների ավտոմատ վերլուծիչ
• Իմունաբանական ավտոմատ վերլուծիչ և բիոքիմիական ավտոմատ վերլուծիչ

ԵՊԲՀ-ի և ՀԷՑ-ի միջև դեռևս 2007թ. սկիզբ առած համագործակցության արդյունքում գործարկվել է նաև Երևանի պետական բժշկական համալսարանի կոգեներացիոն էներգակենտրոնը, ինչը հնարավորություններով եզակի է ոչ միայն հանրապետությունում, այլև տարածաշրջանում։ Այս ինքնատիպ համակարգը գործնական կարևոր նշանակություն ունի ինչպես ողջ համալսարանի, այնպես էլ համալսարանական ավանում տեղակայված կլինիկական և հիվանդանոցային համալիրների ջեռուցման, հովացման և ջրամատակարարման համար։

2009թ. հոկտեմբերի 22-ին Երեւանի Օպերայի եւ բալետի ազգային թատրոնի Արամ Խաչատրյան համերգասրահում տեղի ունեցավ «Ալիաժ քվինտետ»-ի համերգը: Բարեգործական համերգի ողջ հասույքը տրամադրվեց «Հանուն կյանքի» հիմնադրամի ֆոնդին: Հիմնադրամն իր երախտագիտությունն է հայտնում «Ալիաժ քվինտետ»-ին նմանատիպ նշանակալի ներդրման համար: